|
「個底打得好，個女踏入青春期都唔使點擔心喇！」資深傳媒人兼專欄作家屈穎妍說。
「底」，所指的是過往與女兒相處、溝通的時間。屈穎妍只是用了紙張，以及寥寥數字，便培養出三位千金以書信形式跟父母溝通的習慣，她說：「有時我出咗去做嘢，佢哋會將當時發生嘅事或者心情，即時寫低或者畫低，攝喺鞋櫃度，等我返嚟可以見到；有時佢哋激嬲咗我，都會用呢種方法同我道歉。呢堆『家書』，我全部都儲起晒。」由心而發的一字一句，化解了憤怒、失望與懷疑，拉近了一家五口的關係。
踏出第一步
屈穎妍與丈夫林超榮（超人）育有三名千金，分別是十二歲的林起瑩、十歲的林起晴及九歲的林起菲，三女盡得父母優良的基因，喜歡寫作及閱讀，更因母親的窩心小便條，由細到大均習慣以書信或畫作形式表達心聲，「佢哋好細個嗰陣，我已經會寫紙仔畀佢哋，可能係提佢哋記得食提子呀，或者話畀佢哋知放學我會嚟接佢哋。其實內容冇乜特別，但係佢哋都將我嘅信仔全部儲起，久而久之，佢哋都習慣咗用呢種方式同我傾偈。」屈穎妍帶着溫婉的聲線，訴說着跟女兒的溫馨片段。
現在，即使屈穎妍因工作關係，在外未能即時接聽女兒的電話，她們總是會將當時的心情及發生的事情，用紙筆記下來，讓母親回家後可一目了然，「有時佢哋激嬲咗我，都會寫『家書』去同我道歉，講番自己嘅感受，等我哋可以互相了解，一家人嘅關係真係融洽咗好多。雖然好多時候，佢哋都係用廣東話嚟寫，但至少佢哋肯寫， 肯將心底說話表達出嚟。」父母養育兒女，除了需要付出時間與心機外，也少不了要以身作則；由於屈穎妍與丈夫均是愛書之人，三位女兒自小便在書叢中長大，也養成了閱讀的習慣，「我覺得小朋友鍾意睇書都要講基因，其次係要營造一個閱讀嘅環境畀佢哋，當然，家長想小朋友有呢個嗜好，都要先行出一步，自己都要睇埋一份，而唔係不斷咁話：『睇書好呀』，但自己就喺度睇電視或者打麻雀！」
要拋磚引玉
畢業於中大中文系的屈穎妍，曾著有《超人師奶與三囡囡》、《怪獸家長》及《怪獸家長2孩子復仇記》三本親子書籍，她深明跟孩子相處，溝通是相當重要的一環，「因為佢哋喺青春期會開始有啲秘密收收埋埋，如果家長可以喺子女細細個嗰陣，就培養到佢哋同你傾偈嘅習慣，咁就算佢喺成長過程中所收埋嘅秘密，都係極之有限。基本上，當子女到咗十一、二歲，父母就應該稍為調節吓管教方法，即係唔可以鬧咁多、干涉咁多！而且，當你想知道子女有咩心事，作為父母嘅，首先要講個秘密畀仔女聽，呢啲叫『拋磚引玉』！好多細路去到呢個階段，已經覺得自己係大人，佢哋想去參與大人嘅嘢。」
她舉了一個與大女的生活事例，「好似有一次，我同奶奶講電話，原來大女一路聽到晒我講咩，收咗線之後，佢問我咩嘢事，我費事長篇大論講番畀佢聽，就同佢講：『呢啲講你都唔明喇！』點知佢就答：『車，你咩都唔講畀我聽，我第時有嘢都唔講畀你聽喇。』我心諗，係喎，下次我問佢嘢，佢點會再講畀我知？於是我就搵咗一日好詳細咁講咗件事畀佢聽喇，佢仲好開心， 覺得好似刺探咗我啲咩秘密咁添。」屈穎妍笑說。
屈穎妍形容現在有部分家長把自己變成了「仙人掌」，當子女親近時，便拮走他們，「等如我個女話畀我聽，有同學拍拖，又或者鍾意邊個男仔，我會問佢：『靚唔靚仔？喺邊度識㗎？』兜到最尾，我就會講番個道理出嚟，同佢解釋咁早拍拖要小心啲喎，唔好識到壞人、荒廢學業喎。我見好多媽咪一聽到自己個女咁講，就會第一時間話：『你唔好學佢添呀！』就咁拮走個女，以後有啲咩嘢，個女都唔會同佢講㗎喇！如果我個女有一日同我講，佢拍緊拖，我諗我會叫個男仔返嚟食飯， 睇吓佢係咩嘢人！」不禁制、不管束，還有持之以?的溝通與關懷，形成化不開的濃情。
本文摘自4月25日東周刊 親子天地
|
|
|
|
