 |
 |
|
|
 |
| |
|
|
名人教仔 |
|
虎媽鄧藹霖走出地獄記
世上沒有一種痛，比得上被親生兒子憎恨那種萬箭穿心的痛更難受，鄧藹霖感受過。
今日被公認為親子專家的鄧藹霖，主持了港台節目《訴心事家庭》十年，幫助過不少問題家庭，她的理論，除了來自書本外，也來自個人沉痛的經歷。
為望子成龍，鄧藹霖讓兒子考入傳統名校， 小一平均分88.6，名次卻只得33，結果廢寢忘餐催谷兒子做功課、做練習、不停溫習，成績表一到，便又罵又打，整個人跌進了地獄，逼瘋了自己，也逼到兒子痛恨自己，「有一日，我發現個仔將我畫成一個極度肉酸嘅巫婆，全身都係一個個窿，原來佢畫完之後攞支筆篤篤篤篤篤，嗰刻我終於醒喇！」自此，虎媽轉行不打、不鬧、不恐嚇、不黑面的四不政策，終結兩年半的地獄生活。
噩夢
鄧藹霖說，她的人生在三十歲當了媽媽後才正式展開。與一般母親無異，她盡力將最好的都給予大兒子Conrad，帶他周遊列國見識世界，每晚給他讀三本故事書，卻忘了要教他中、英、數，「以為返咗學自然有老師教」，結果兒子以說故事的面試形式成功進入一間傳統名牌小學，舉家幾乎要開香檳慶祝，卻原來是個噩夢的開始。
「嗰度啲學生個個都係尖子，小學前已經識背晒乘數表、串晒英文生字，但我個仔嘅程度只係識得由一數到一百。」小一首次考試後，Conrad獲得平均分88.6，鄧藹霖還高興得偕丈夫兒子外出食飯慶祝，後來才知道Conrad在全班三十七人中考第三十三名，「嗰刻開始癲喇，接受唔到個仔唔夠人哋叻，我已經推晒啲應酬，日日陪個仔溫書，點解會咁o架？我就係嗰刻跌落個陷阱度，往後兩年半嘅時間，我日日都係捉住佢讀書、做功課、做練習，連電視都冇得睇！」
成績表
最初是恐嚇，繼而是打。鄧藹霖愈緊張兒子的學業，便愈控制不了個人的情緒，「一打咗第一下就會愈打愈勁，我好多次嘗試控制自己唔好打個仔，但仍然忍唔住捉實佢個膊頭不停搖，不停話：『點解你要咁對我？』情緒係失晒控！」除了兒子放學後需要不停做功課及溫習外，每天早上，鄧藹霖也會捲着髮卷、化着妝，在上班前兩小時叫兒子起牀，爭取時間做練習。如此不分晝夜的催谷，兒子的成績還是一點也沒有好轉。
這種日夜溫習、又打又鬧的生活，持續了兩年半，直至大兒子升上小三，鄧藹霖才驚覺兒子對她不瞅不睬，「我一唔喺佢旁邊，佢就會成個人冇晒力咁伏喺度；有次我入佢房，發現佢畫緊公仔，一知道我入嚟就即刻揸巢張紙扔落垃圾桶。到佢返咗學喇，我就偷偷哋執番張紙睇吓佢畫咩，一攤開，好恐怖，係一個好醜樣嘅女人，頭頂有個箭嘴，寫住兩個中文字—『媽媽』，再睇清楚啲，點解呢個公仔穿晒窿嘅？原來佢係畫完之後攞支筆篤篤篤篤篤，我坐喺地下喊到崩潰，個心好痛好痛，呢張就係我做阿媽嘅成績表喇！好折墮呀！我竟然畀自己最錫最愛嘅人咁憎恨，呢個帶住恨嘅小朋友，將來又點會有前途呢？」
四不政策
那一刻的鄧藹霖如夢初醒，彷彿聽到一把聲音在跟她說：「你當初明明承諾只想個仔幸福快樂，講完都冇做嘅？日日打佢鬧佢，為佢創造地獄，你究竟想要乜？」她紅着眼憶述，聲音抖顫，「我當時答番佢，任何可以令到個仔愛番我嘅方法，我都會做！」結果，翌日，鄧藹霖便為兒子退學，轉到國際小學就讀，繼而辭去公務員工作，轉為兼職，更由零開始重新鑽研心理學書本，學習如何做一個好媽媽，「我深信教仔女有超過一百種方法，我唔信唔打唔鬧就教唔到仔，自此之後，我決定不打不鬧不恐嚇不黑面，咁啱我個細仔喺呢一年先出世，所以佢從未見過我個惡樣，反而仲比哥哥好教咗喎。」因為經歷過黑暗階段，Conrad性格悲觀，需要父母不斷的鼓勵；不過，今日他已是港大英文系畢業生，兩年前獲得大學頒贈、一級只得一個的「英國文學獎」，今年九月更會到英國倫敦大學學院修讀Theme Study碩士課程。至於幼子Eugene，同樣成績優異，考試十科Ａ，其中七科更是A+成績，但仍需要父母的安慰，「佢會為有三科攞唔到A+成績而唔開心，所以兩個仔兩種教法，細仔完全唔需要勞氣、唔需要鬧，成績都係好好，好乖！」鄧藹霖與丈夫、前港台副廣播處長吳錫輝育有兩子，大仔Conrad今年廿二歲，幼子Eugene今年十四歲。
鄧藹霖於港台節目《訴心事家庭》中分享個人的地獄經歷，得到廣大聽眾支持，一做便是十年，個人存在價值提高了，她也笑說：「原來老女人都有用途o架！」
本文摘自7月20日東周刊 親子天地 圖：星島圖片庫、受訪者提供
|
|
|
